loader

ملحق الجريمة

تصغير الخطتكبير الخط العودة أرسل  ارسل إحفظ  إحفظ إطبع  إطبع PdfPdf

الكلام لك

قالت جدتي


عائلة من الدياي الأحمر مع فروخها قاعدة بالخن والفروج يلعب والديك طالع ما هو موجود وجنبهم عائلة ثانية صديقة من الدياي الابيض قاعدة تتمشى وتسولف مثل الدياي الاحمر اللي قاعد بالخن ما تسمع منها الا اصواتاً فأقأه تعني الحجي جنس ناعم ما يستغني عن القرقة سوالف تروح وسوالف تجي مرة عن الأزياء شنهو احدث ريش صيفي نزل السوق ومرة عن السفر مع شوية حش بفلانه أو بالديك العلاني.. سوالف عن الرجيم او الطبخات الجديدة وطبعا القعدة ما تخلي من صحن فيه شوية شعير وعدس مخلوط بالذرة اقصد المكسرات الفروخ اللي بالخن ضاقت من السوالف فطلبت تروح تلعب بالسكة واستأذنوا من امهم اللي ما سمعت شنو قالوا لها.. وطلعت الفروخ الحمر وهناك شافوهم الفروخ البيض واشتركوا معاهم في اللعب كتاكيت اشحلاتهم يلعبون ويتغشمرون مع بعض وفجأة فرخ ابيض وهو ما يدري داس على رجل فرخ احمر فدز الفرخ الاحمر الابيض اللي رد الدزة للفرخ الاحمر والتموا الفروخ وتشابكوا وهم يطبقون المثل اللي يقول انا واخوي على ولد عمي وانا وولد عمي على الغريب وتعالت اصوات الكتاكيت اللي يبكي واللي يصرخ ففزت الديايات البيض والحمر من خنها.. وكل واحدة لمت كتاكيتها وبدأ عتاب الامهات فرخج طق فرخي وترد الثانية لا فرخج هو اللي عايل لأن فروخي مؤدبه وانت فروخك مو متربين وتبدأ معركة كلامية بين الدياي الابيض والاحمر ويتحول الصوت العالي الى مناقد ونتف الريش والفروخ تطالع وتتطمش وشوي شوي تهدأ معركة الامهات والكل يبجي وينسحب راجع لخنه الفروخ البيضة والحمرة تطلع للسكة وترد تلعب مع بعض ولا كان شي صار. يا ريت الجيران والعوائل يتعلمون من هالقصة ان اغلب مشاكلهم سببها أطفال يلعبون وعشان جذية قالوا أجدادنا الله يرحمهم احياء او اموات.. لا تتكلمون بالقطاعة والصغار قعود الكبار تفنى والصغار تعود.. عاد نتعلم من اقوالهم.. للأسف لا.. لا الناس اليوم غير ناس اول.. غيره ، وحب للمال ، وحسد.. ناسين ان نهايتهم متر في متر.. هذا اذا مادفنونا وقافي من ندرة الاراضي.


إضافة تعليق جديد

التعليق الوارد من المشارك أو القارئ هو تعبير عن رأيه الخاص ولا يعبّر عن رأي جريدة النهار الكويتية

عرض التعليقات

 

اشكر من تابع صفحات الملاحق الاستراحة والجريمه واعتذر لعدم امال المشوار بهذين الملحقين لسياسة الجريده الجديده واتمنى ان اتواصل معكم لاحقا اخوكم سميح القلاف

اخي سميح لقد امتعتنا بكتاباتك طوال الفترة الماضية وانا من المتابعين الجيدين لهذه الملاحق وللزاوية بالذات التي امتعتنا بها بكتاباتك الساخرة والهادفة بآن واحد ولا تعلم لماذا اوقفتها الجريدة فنتمنى ان تعود مرة اخرى لكتابة الملاحق والزاوية بالذات لان لدي مشكلة اود ان اطرحها من خلال زاويتك وشكرا لك


وين باجر كتاباتك أخ سميح بصراحة فقدناها

نبي هالكتابات بصراحة ماكو اروع منها

ما قصرت مشكور

ليش تحرمونا من هالملاحق بصراحة الملاحق ولا اروع يعني قصص بصراحة و الصراحة ما ينزعل منها الملاحق بجد روعة ماكو عليها اصلا !

شلون جذي ليش وقفتوا الملاحق و ليش تحرمونا من هالكتابات ؟

ليش تحرمونا من هالكتابات

بصراحة تعودنا نقراها ما يصير تحرمونا مني و الطريج

اتمنى تسموعن آراء قراءكم لان انا من اشد المعجبين بهالكتابات

د/ سعاد واختي ريم نحن نعمل بمطبوعه لها سياستها وعلينا ان نقبل بالامر وانا اعلم ان القرار بايقاف الملاحق ريخدم بعض قراء الجريده ولكن هم الاحق باصدار القرارات على حسب مايقول المثل
حلالهم وكيفهم .
اشكركم على المتابعه وسوف استمر بكتابه القضايا والزوايا باحد المواقع الاكترونيه تجدونها على قوقل سايت والله الموفق ..

مواقيت الصلاة في الكويت


المزيد

معدل التحويل

تاريخ:

قاعدة دينار كويتي

معدل التحويل


KWD

EUR

GBP

JPY

CAD

AUD

RON

RUB

محول العملات